Krakatau kuwi gunung geni kang isih aktif lan dumunung ana ing Selat Sunda antara pulo Jawa lan Sumatra. Gunung geni iki tau njeblug nalika tanggal 26 Agustus 1883. Jeblugané gedhé banget lan tsunami ang diakibataké nganti niwasaké watara 36.000 jiwa. Nganti tanggal 26 Desember 2004, tsunami iki minangka kang paling gedhé. Suwara jeblugan Gunung Krakatau nganti kaprungu sakaAlice Springs, Australia lan pulo Rodrigues cedhak Afrika, 4.653 kilometer. Daya ledhaké kira-kira nganti ping 30.000-né bom atom kang njeblug ing Hiroshima lan Nagasaki ing pungkasané Perang Donya II.
Jeblugan Krakatau nyebabaké owah-owahan iklim global. Donya nganti peteng watara loro setengah dina akibat awu vulkanis kang nutupi atmosfer. Srengéngé suminar redhup nganti setaun lawasé. Hamburan awu katon ing Norwegia nganti New York.
Jeblugan Krakatau iki sakbeneré isih kalah dibandingaké karo jeblugan Gunung Toba lan Gunung Tambora ing Indonesia, Gunung Tanpo ing Selandia Anyar lan Gunung Katmal ing Alaska. Nanging gunung-gunung kasebut njeblug nalika populasi manungsa isih sethithik banget. Sauntara kuwi nalika Gunung Krakatau njeblug, populasi manungsa wis cukup padhet, sains lan teknologi wis wiwit ngrembaka, telegraf wis ditemokaké, lan kabel ngisor segara wis dipasang. Kacathet jroning sajarah yén jeblugan Gunung Krakatau kuwi bencana gedhé pisanan ing donya sawiséh panemon telegraf ngisor segara. Kamajuan mau, émané durung diimbangi déning kamajuan ing babagan geologi. Para ahli geologi wektu kuwi malahan durung bisa mènèhi panjelasan ngenani jeblugan kasebut.
![Krakatau [Krakatoa] - Sundra Strait, Indonesia](https://img1.advisor.travel/f550x450px-Krakatoa_5.jpg)
