Kadhaton Deoksu punika salah satunggaling kadhaton saking Lima Istana Utama Dinasti Joseon. Astana Deoksu punika naté dados dalemipun pemimpin Dinasti Joseon dumugi periode penjajahan Jepang. Jinis bangunan ing kompleks Astana Deoksu punika wonten bangunan kayu kanthi gaya Barat. Minangka bangunan tambahan, ing area komplêks ugi wonten muséum seni, kebun raya, lan monumen Raja Sejong. Wiwitanipun dipunparingi nama Gyeongungung ( Astana Gyeongun ), astana punika wiwit kondhang awit pungkasan anad kaping 19 lan purwa abad kaping 20 amargi dados latar wingking konflik pulitik antawisipun Dinasti Joseon kaliyan pihak asing. Ing sejarah Korea, Astana Gyeongun dados papan dipunplokamiraken Kekaisaran Han Raya .
Generasi kapisan Astana Deoksu punika vila ingkang dipunbangun ing taun 1450-an minangka papan kanggé ngaso Pangeran Wolsan . Vila punika dipunparingi nama Seobyeolgung ( Vila kilen ). Ing pungkasan abad kaping 16, sasampunipun sadaya astana lan kutha krajan Dinasti Joseon musna kobongan amargi Perang pitung taun kulawarga kerajaan pidalem wonten ing Seobyeolgung dumugi Astana Changdeok pungkasan dipunbangun. Namanipun dipunewahi dados Gyeong-un-gung ( Astana Gyeong-un). Astana Gyeong-un dipuntilar radi dangu sasampunipun Astana Changdeok dipunginakaken malih minangka astana resmi. Ing pungkasan abad kaping 19, nalika tiyang Amerika, Rusia, Prancis, lan Inggris dugi ing Seoul, Raja Gojong pindhah dhateng Astana Gyeongun lan ndadosaken minangka astana utami. Lajeng nama Joseon dipunéwahi dados Kekaisaran Han Raya lan nginggilaken statusipun saking raja dados kaisar. Prastawa punika dados simbolisasi bilih Joseon, negeri ingkang nembe dipundesak déning kekuwatan asing sampun medal saking campur tangan Kekaisaran Cina ( Qing ).
Astana punika dipunrenovasi saking taun 1902-1904. Ananging nalika taun 1904 wonten kobongan saéngga ngrisak bangunan punika. rekonstruksi malih dipunadani dumugi pungkasan taun 1906. Ing taun 1905 Jepang menang wonten ing Perang Russo-Jepang ingkang Rusia dipunsingkiraken saking Korea lan Kekaisaran Jepang ndhèrèk urusan ing negeri Korea. Nalika januari 1907, Raja Gojong dipunpeksa mandhap saking tahta lan maringaken tahtanipun dhateng putranipun Sunjong. Ing wekdal punika nama Astana Gyeongun dipungantos dados Astana Deoksu. Kados astana sanèsipun, pamarentah kolonial Jepang mbikak Astana Deoksu dados taman umum.