Seokguram (石窟庵; Gua Seokgul) inggih punika setunggaling kuil Buddha ingkang mapan wonten ing Gunung Toham mliginipun ing Gyeongju, provinsi Gyeongsang Lor, Korea Selatan . Seokguram inggih punika harta nasional Korea Selatan nomor 24 saking taun 1962 lan ugi minangka salah satunggaling Situs Warisan Donya UNESCO awit saking taun 1995. Kim Daeseong minangka satunggaling perdana menteri wonten ing kerajaan Silla Bersatu dipunandharaken ngawontenaken rekonstruksi Gua Seokgul wonten ing taun 742 nalika masa pamaréntahanipun Raja Gyeongdeok. Pambangunan kasebut kapungkasan nalika taun 774 lajeng wiwitanipun dipunparingi nama Seokbulsa (석불사, Kuil Buddha Batu). Gua Seokgul punika dados papan ngibadah (peribadatan) khusus kanggé kulawarga kerajaan Silla wonten ing masanipun. Miturut sejarahipun Silla punika mbangun Seokguram kathi madep ing laut wetan kanthi ancas supados Buddha punika saged dados penghalau seranganipun Jepang dhateng Korea.
Seokguram sajatosipun punika gua damelan ingkang dipunwukir saking pahatan watu granit lan dipundesain kanthi khusus kanggé tujuan ziarah. Aula utama kuil inggih punika ruangan ingkang awujud bunder. Pusat aula utama inggih punika Buddha saking watu granit ingkang lenggah wonten ing sanginggilipun tumpukan kembang teratai. Buddha kasebut dipunubengi déning wukiran-wukiran figur bodhisatva, tiyang-tiyang suci lan ugi para dewa India wonten ing tembok kuil. Kubah aula dipunbangun kanthi saperangan pancang watu granit lan diamèteripun dumugi 6,58 meter. Figur-figur ingkang ngubengi Buddha inggih punika Bodhisatva Manjusri lan Samantabhadra sarta dewa Brahma lan Indra.
Buddha Seokguram dipunpuja minangka karya seni Korea mawi nilai ingkang awis sanget. Buddha Seokguram inggilipun punika kirang langkung sekitar 3,5 meter lan lenggah wonten ing tumpukan kembang teratai lan dipunwukir saking watu granit. Buddha Seokguram punika dados lambangipun Sakyamuni kanthi papanipun tangan minangka lambang piyambakipun ingkang sampun pikantuk pencerahan. Buddha punika dipunjangkepi ugi kalihan bunderan cahya ingkang dipunwukir ing témbok aula kuil ing wingkingipun. Seokguram naté nglampahi rénovasi bola-bali amargi risak lan ugi amargi boten kaurus kanthi wekdal ingkang dangu saengga miturut prakiraan sampun kathah éwahipun saking wujud ingkang asli. Renovasi naté dipunlampahi nalika taun 1703 lan ugi taun 1758 ing zaman Dinasti Joseon. Rénovasi wonten ing zaman penjajahan Jepang kalampahan saking taun 1913-1915 sansaya damel risak parah kawontenan Seokguram amargi wonten upaya pambongkaran lan panyusunan malih komponen Seokguram. Miturut Perang Korea upaya nglampahi renovasi kanthi ageng punika dipunwontenaken nalika taun 1960-an déning almarhum Presiden Park Chung-hee.