Tulum (pangucap cara Spanyol: ], Yukatèk: Tulu'um) ya iku situs awujud kutha sing kinupengan bètèng saka jaman kabudayan Maya Pra-Colombus lan minangka pelabuhan gedhé tumrap ing kutha Cobá. Tilas kuthané kapernah ing parang sing dhuwuré 12 mèter ing sadawané pasisir wétan Ujung Yukatan ing Segara Karibia ing praja Quintana Roo, Mèksiko. Tulum iku salah siji kutha pungkasan sing diyasa lan didunungi wong Maya. Kuthané kuncara nalika antarané abad ping 13 lan 15 M, lan mbudidaya supaya lestari nganti udakara 70 taun sawisé wong Spanyol miwiti njajah Mèksiko. Lelara ing Jagat Lawas sing digawa déning wong Spanyol njalari tibané kurban pati sing cacahé akèh, déné ngrusak tatanané bebrayan sing temahané njalari kuthané dientharaké.[butuh sitiran] Saiki Tulum dadi salah siji situs tilas kabudayan Maya ing laladan pasisir sing paling apik pangrumaté lan kesuwur tumrap ing wisatawan.
